端午商機

今年選擇了去俄羅斯渡過端午，未能和大家一起聽龍舟鑼鼓，卻也想祝大家假期快樂。

選來自己看過的一篇文章，來自鬼才陶傑AM730 五月六日文章｢手尾長｣：

奧黑馬做瓜拉登，估唔到仲手尾長，首先條屍，下落詭異，美方公布，為尊重「伊斯蘭習俗」，廿四小時，經已打包海葬。怒海沉屍，攞大英雄條鹹魚餵大白鯊，毀屍滅跡，咁就叫「尊重伊斯蘭文化習俗」？開講有話：盲精啞毒黑焦積，奧黑馬咁樣攞彩，攞得夠寸兼陰毒。條屍掟落海，不過咁，又會製造無限商機。首先，中國文化可以乘勢輸出中東，端午節，扒龍船，可以教識D阿拉伯佬，食梘水粽，裹蒸粽，中國人食粽文化，發揚光大。我國有屈原，阿拉伯有拉登，一樣係投水含冤，變成千古英烈，後人景仰，屈原陰曆五月初五，拉登就新曆五一蒙難，以後地球一體化，一粽兩食，一節兩賀，D龍船喺阿拉伯海扒完，運過來大唐東土，輪到喺維港開波，發展體育運動，又可以紀念英烈偉人，你話幾有意思？包粽包到去中東，就要入鄉隨俗，尊重人哋文化，食豬肉十分政治敏感，因此鹹肉粽，就要刪除，隻糯米粽改填塞以羊肉，並改名為「拉登粽」，以垂久遠。  扒龍船，打鑼鼓，就要香港國術團體派出健兒去中東，訓練支援，教識D阿拉伯佬點樣打得大聲D，至可以嚇走D鯊魚——因為汨羅江底，最多係D魚毛蝦仔，阿拉伯海就唔同，又虎鯊，又魔鬼魚，打到姐姐咁款，有氣無力，點樣保存到拉登英雄全屍不受囓咬分食呢？阿拉伯鬼最憎奧黑馬，鑼鼓器具，可以改良，例如將個大皮鼓，畫個奧黑馬肖像上去，一棍棍摳落去，當做鵝頸橋底打小人咁打，咁又可以消氣解恨，大家話，拉登瓜柴，文化交流，係咪一件好事呢？ 佳節愉快！